租屋壞冷氣　邊個負責維修？

「包租婆超好，上星期同佢講冷氣唔夠涼，今個禮拜就換部新機畀我！」Nancy剛搬出來住，對新業主印象唔錯。阿Tom覺得佢好好彩：

要搵個夾得來嘅業主唔容易㗎。

阿Tom出來租樓多時，但佢自言經常「遇人不淑」，一係遇着發錢寒業主，一完約就大幅加租；再唔係就話業主孤寒、難相處，未夠期就催交租，電器壞又唔肯出錢換，有次仲要自掏荷包換新冷氣機。

我聽完有啲唔明：

你哋一個話包租婆搞掂，一個就話要自己出錢，到底租樓有嘢壞，邊個負責？

阿Tom知我未租過樓，耐心解釋：

其實視乎租約點寫，好難一概而論。

佢舉例，有啲業主會喺租約講明，只負責外牆、水渠等結構問題，屋內家電維修租客自理；但亦有業主會喺租約上寫明提供冷氣、洗衣機等，若果呢啲設施壞咗，變相無法履行租約條款，所以業主有責任處理呢啲項目嘅維修。

如果業主叫極都唔嚟整，咁點算？

我朋友試過自己搵師傅整，嗰個月交少500蚊租，話要claim番筆維修費喎。事後業主嘈咗佢好耐，最後算數。

以後我朋友壞嘢call佢，佢都唔敢唔聽電話，或者怕佢又先斬後奏，獅子開大口啩？

阿Tom笑言上次壞冷氣都想仿傚呢條蹺，但佢嘅律師朋友提醒，租客擅自從租金扣減維修費，或會遭業主入稟追租，所以佢先打消念頭，自行解決。

全文刊於《晴報》

《晴報》facebook